ايتأ کۊجي دانه داستان
مي ديل خأيه وختي پيله-أ بؤستم, ميرأث فرهنگي رئيس ببم.
نأ اينکي مي ديل گۊل چيره ديلˇ أمرأ تۊشکه بۊخۊرده-يه, خۊدأ شأهده نأ.
أنˇ وأستي کي أ ايدأره خؤرم جيگأيه.
کارˇ خأصي کي نۊکۊنيدي اۊ دۊرۊن,
بۊنگأيي-يأنˇ مأنستن صؤب تأ غۊرۊب اۊطأقˇ دۊرۊن نيشتئده دئه.
أممأ هر جيگأ شيدي تأ خۊشأنأ معرفي کۊنيد, همه أشأنه بپأ ايسيدي.
بۊخۊصۊص بۊنگأيي-يأن ؤ بسأز بۊفرۊشأن.
بۊنگأ بۊگؤدم, ديرۊ من ؤ مي پئر بۊشؤبيم بۊنگأ خأنه دۊمبألأ.
أمي مؤهلت دئه کرأ بسر أمؤن دره, وأ ويريزيم.
پيله-ترأنˇ مأمله کۊدنأ گمه, بزين أمرأ گيدي . . .
مي پئر گه أمأ ايجأره نأمه نأريم, أممأ أمي مؤهلت کرأ بسر أمؤن دره.
هر دفأيم أنأ وأورسم, چأر تأ آبدأرˇ فاش خأنخأيأ ديهه, بزين گه:
«کؤ گيل خأيه شمرأ به تنأ گيره؟!»
اۊ رۊزه کي أمأ بأمؤبيم أ خأنه دۊرۊن, خأنخأ گؤفتي:
تأ شمه ره ايتأ خأنه نيهه-ييد تأنيد أيأ بينيشينيد.
ايجأره-يم نخأيم.
فقد بپأييد أ دؤرسفته خأنه شيمي سر فۊنگۊرده.
بأمؤييم ثوأب بۊکۊنيم کبأبأ نيبيم.
*
*
خأنخأ کي سأل به دوأزده مأ, خأنه جأ وأنورسه-يي,
پريرۊ أمي کۊچه سرˇ بۊنگأيي مرأ بأمؤبۊ أمي خأنه.
ألبت خۊ خأنه بأمؤبۊ, هۊ دؤرسفته خأنه. گؤفتي:
أ خأنه-أن خأيلي قيمتي-ييد.
طلأييدي بره, طلأ.
آ مأمۊد, مٚتٚر کۊني دئه نيئه؟
عقب-نيشيني-يم دأره؟ٚ!
*
*
دۊ شبه ايچي مي فکرأ مشغۊلأ کۊده دأره؛
نأنم چي ره اۊ مردأى کي أشأنˇ أمرأ بۊ قيأفه,
مه ره گۊل چيره پئرˇ قيأفه شبأهتأ دأيي!!!
