منفي ورچسبأنأ فيشأنيد
وألت ديزني وختي جوأن بۊ ايتأ مجله ره کأر کۊدي. اۊ مجله ويرأستأر اۊنأ بۊگؤفته بۊ کي خلأقييت نأره ؤ أنˇ تجسؤمˇ قؤدرت ضعيفه. وينستؤن چرچيلˇ درز ضعيف بۊ يؤ هميشک کألجˇ وۊرۊدي ايمتحأنأ رددأ بؤستی. هممه-تأ مؤفقˇ آدمأنˇ ایجۊرید. اۊشأن, منفي ورچسبأنأ فيشأنيدي. چۊنکي اۊشأن خۊشأنه دأنيدي کي اۊني کي مردۊم گيدي جأ بئتريد. هأنˇ وأسي بتأنستد ايتأ زيويشي کي هلمأله-کس نتأنستي اۊنˇ فيکرأ بۊکۊنه-يأ خۊشأنه چأکۊند. مردۊم هرسأعت دقه أمرأ ايتأ ورچسب زنيدي. اۊشأن أمرأ گيدي کي کؤ کأرأ تأنيم بۊکۊنيم ؤ کؤ کأرأ نتأنيم بۊکۊنيم. ويشترˇ مؤقه-أن اۊشأنˇ نظر, اۊني کي خۊدأ أمه ره بخأسته أمرأ فرخ کۊنه, أممأ أگه مۊوأظب نيبيم اۊشأنˇ گبأنأ حأيقتˇ جأ قۊبۊل کۊنيم ؤ آخربسره, اۊشأنˇ گبأن أمي ذهنˇ دۊرۊن کۊنه کۊنيد ؤ أمرأ ونأليدي أمي سرنيويشتأ فأرسيم.
ايتأ مردأکˇ مرأ گب زييم کي مٚدٚرسه مؤقه, مۊشأور اۊنأ بۊگؤفته بۊ استعدأدˇ خأصي نأره ؤ بئتره خؤرأ هأچينه کأرأنˇ مرأ تيتألأ کۊنه. اۊ مۊشأور أ ورچسبأ اۊنˇ سر دۊچکأنه بۊ کي مۊتوسطˇ آدمه ؤ هيزره استعدأد نأره. اۊنم أ ورچسبأ ايتأ وأقييتˇ مأنستن قۊبۊل بۊکۊده بۊ يؤ سألأنˇ سأل هۊتؤ بزيوسته بۊ کي, من بأکلله ني-يم ؤ هيچي نبم. دبيرستأنˇ پسي اۊن بينأ کۊده ايتأ کأرخأنه دۊرۊن کأر کۊدن. سألأنˇ سأل ايتأ مأمۊلي شؤغلˇ دۊرۊن مشغۊل بۊ. ايرۊز اۊ کأرخأنه تعطيلأ بؤسته ؤ اۊن, أنˇ وأسي کي ايتأ دئه شؤغل بييأفه بۊشؤ ايتأ کأرخأنه ديگه دۊرۊن کأر بۊکۊنه. اۊ کأرخأنه قأنۊن أن بۊ کي, وأسي تستˇ هۊش بدأبي تأ أنأ وهأشتي-بيد اۊيأ کأر بۊکۊدي-بي. اۊنˇ تستˇ هۊش, خأيلي عجيب بۊ. نشأستي بأور کۊدن, اۊنˇ هۊش ايتأ نأبغه آدمˇ أندر بۊ.
کأرخأنه مسئۊل تعجۊبˇ
مرأ اۊنأ وأورسه: أ هۊشي کي دأري أمرأ, چي ره أ مأمۊلي شؤغلˇ ره درخأست بدأيي؟ اۊ سألي کي کأرخأنه بينأ بؤبؤستنه تأ هسأ, هي کسˇ تستˇ نؤمره أنقد زييأد نۊبۊ! هۊ رۊزه بۊ کي اۊ قديمي ورچسبأن همه-دأنه, اۊنˇ ذهنˇ جأ پأکأ بؤستد. ورچسبأني کي 17 سألˇ ره وأقييتˇ جأ قۊبۊل بۊکۊده بۊ. آخربسره, اۊن خۊ کأسبي-يأ برأ تأودأ ؤ أسأ أنˇ دأشتˇ دأرأيي-يأ ايشمأردن نشأ. أگه شۊمأنم بسر دکفتيد کي پيشرفت بۊکۊنيد وأسي شيمي ذهنˇ منفي ورچسبنأ هممه-أ پأکۊنيد. أگه ايتأ خؤرم زيويشˇ دۊمبأليد, وأ أول, خؤرم فيکر بدأريد. هيچ وخت بؤبؤسته کي شيمي دؤر ؤ وري-يأن شمرأ بيگيد کي نتأنيد شيمي نأجه-أ فأرسيد؟ بقأيده استعدأد ؤ منأبع نأريدي؟ هيچ وخت أ منفي ورچسبأنˇ مرأ شيمي زيويشˇ دستأوردأنأ محدۊدأ کۊدن نوأييد. أن مردۊم ني-ييد کي گيدي شيمي سرنيويشت چيسه, أن خۊدأىˇ کي گه شيمي سرنيويشت چيسه.
وختي مي پئر سألˇ 1999 فؤت بۊکۊده من بؤبؤستم ايتأ سۊخنرأن ؤ مي کأرأ شۊرۊ بۊکۊدم. تأ هۊسأ من هيچ وخت سۊخنرأني نۊکۊده بۊم. ايتأ نيشتأنˇ دۊرۊن وختي کي نيشت تۊمأنأ بؤسته ايدفأيي دۊ نفرˇ گبأنأ بيشتأوستم. ايتأ اۊشأن وأگردسته اۊيتأيأ بۊگؤفته: جؤل نتأنه خۊ پئرˇ مأنستن خؤب سۊخنرأني بۊکۊنه. اۊيتأ بۊگؤفته: آهأ, هأ رۊزأنˇ کي هفتگي سۊخنرأني-يأن تعطيلأ به. من اۊ أول أولأن منفي فيکرأني دأشتيم کي گؤفتيدي ولکم أ کأرˇ لييأقتˇ نأرمه. اۊ دۊ نفرˇ گبأنˇ مرأيم أ فيکرأن مي ذهنˇ دۊرۊن وأج بأمؤ. منفي ورچسبأن مي ذهنˇ دۊرۊن حأک بؤبؤسته بۊ کي من بقأيده خؤرم ني-يم. کلمه-أن دأنه-أنأ مأنيدي أگه مأقؤل زمأت اۊشأنأ شيمي ذهنˇ دۊرۊن آب بديد کۊنه کۊنيدي يؤ بيدي شيمي وأقييت.
من مي تۊمأمˇ حقˇ سأيأ بۊکۊدم کي اۊ منفي ورچسبأنأ مي ذهنˇ جأ پأکۊنم, أممأ اۊنقدم سأدده نۊبۊ. أ منفي فيکرأن هأتؤ تترج مي ذهنˇ دۊرۊن وأج أمؤييدي کي تۊ بقأيده خؤرم ني-يي, تۊ لييأقت نأري تي پئرˇ جأيأ بيگيري. أ ورچسبأنأ پأکۊدن رأحت ني-يه. أنأ مأنه کي ايتأ قديمي ورچسب مأقؤل زمأت شيمي مأشينˇ شيشه سر دۊچکسته-بي يؤ أسأ هرچقد حقˇ سأى کۊنيدي اۊ ورچسب پأکأ نيبه. خأيلي مي فيکرأنˇ سر کأر بۊکۊدم تأ اينکي آخربسره بتأنستم اۊ منفي فيکرأنأ مي ذهنˇ جأ پأکۊنم ؤ بأور بۊکۊنم کي أگه خۊدأ مرأ بأل بزنه تأنم همه-کأر بۊکۊنم. أگه اۊ زمأت حئيقت اۊ منفي فيکرأنˇ سر کأر نۊکۊده-بيم هيچ وخت نتأنستيم أ جأجيگأيي کي دأرمأ فأرسم. منفي ورچسبأن تأنيدي کأري بۊکۊنيد کي شۊمأنم شيمي سرنيويشتأ فأنرسيد. ونأليد بيس سأل دئه أ ورچسبأنˇ مرأ هأنده بزيويد. شۊمأن اۊني ني-ييد کي مردۊم گيدي, شۊمأن اۊني ايسيد کي خۊدأ گه.
مردۊم شمرأ گيدي کي شۊمأن بقأيده خؤرم ني-ييد, تۊ پيري, تۊ بأکلله نيئي, أممأ خۊدأ گه: تۊ قوي-يي, تۊ استعدأد دأري يؤ أرزشمندي. أن, مۊثبتˇ ورچسبأنيدي کي شمرأ بأل زنيدي کي خؤرم زيويش بدأريد. ورچسبأني نهأ کي شمرأ ونأشته پيشرفت بۊکۊنيد؟ مۊشأور يأ مۊربي-يي بۊ کي ايتأ منفي ورچسب شمرأ دۊچکأنه-بي؟ شيمي پئر ؤ مأر زرخˇ گب شمرأ بزه دأريد؟ تنأ قؤدرتي کي أ منفي ورچسبأن دأريدي قؤدرتي ايسه کي شۊمأن اۊشأنأ فأديدي, أگه شۊمأن اۊشأنأ شيمي ذهنˇ جأ پأکۊنيد ؤ دئه هلمأله اۊشأنأ فيکر نۊکۊنيد اۊشأن نتأنيد شيمي سر مأله بنيد. اۊ دۊتأ ريفئق, همأيشˇ سألۊنˇ لأبي دۊرۊن بۊگؤفتيد هأ رۊزأنه کي مي سۊخنرأني تعطيلأ به أممأ, اۊشأن نتأنستد مي سرنيويشتˇ جۊلؤيأ بيگيرد. اۊشأن نتأنستد خۊشأنˇ گبأنˇ مرأ, خۊدأ خأسته جۊلؤيأ بيگيرد. اۊشأن فقد مؤقه-يي تأنستيد أ کأرأ بۊکۊنيد کي من, اۊ منفي ورچسبأنأ دۊچکسته-بيم.
ايتأ مردأکˇ مرأ گب زييم, گؤفتي کي دبيرستأنˇ دۊرۊن أنˇ معلم أنˇ مأرأ بۊگؤفته بۊ کي اۊنˇ کلله کأر نۊکۊنه. معلمˇ أ گب بأعيث بؤبؤسته بۊ کي اۊن سي سأل أ فيکرˇ مرأ بزيوه کي هيچ مؤقه نتأنه مؤفق ببه. اۊن شبأندˇرۊز أ فيکرˇ دۊرۊن دره بۊ کي أنˇ کلله کأر نۊکۊنه. من هۊني-يأ اۊنأ بۊگؤفتم کي شمرأ گؤفتن درم؛ تۊ وأسي اۊ منفي ورچسبأ تي ذهنˇ جأ پأکۊني. اۊ معلم حؤکمن اۊ نؤمره-يي کي ايمتحأنˇ دۊرۊن فيگيفتي جأ أ گبأ بزه دأره, أممأ اۊن نأنستي کي خۊدأ وأبرأزئنˇ بذرأ تي وۊجۊدˇ دۊرۊن بکأشته دأره, وأسي تي مرأ بيگي من هيچ وخت أ ورچسبأ مرأ دۊنچکأنم. ولکم أن خألي اۊ معلمˇ نظر ببه أممأ ايتأ دئه نظر نهأ کي اۊن, خۊدأ نظره. پيله خۊدأ نظر أنˇ کي من, خؤرم سرنيويشتأ فأرسم.
هيچ وخت ونأليد منفي ورچسبأن شيمي پيشرفتˇ جۊلؤيأ بيگيرد. ايتأ دبيرستأني دأنش آمۊزˇ مرأ گب زييم, مي جأ بخأسته کي: جؤل, مه ره دۊعأ بۊکۊن کي بتأنم ايمتحأنˇ دۊرۊن نأقلن قۊبۊلأ بم. وأورسئم: چي ره أ دۊعأيأ نۊکۊنم کي تۊ ويشتري نؤمره-أ بأوري؟ اۊن بۊگؤفته: نأ جؤل, مدرسه مۊشأور مرأ بۊگؤفته کي مي درز ضعيفه ؤ وأسي حقˇ سأى بۊکۊنم نأقلن قۊبۊلأ بم. اينفر اۊنأ منفي ورچسب بزه بۊ يؤ اۊنم اۊ ورچسبأ خۊ وأقييتˇ جأ قۊبۊل بۊکۊده بۊ. اۊنأ بۊگؤفتم: تأ هسأ فيکر نۊکۊدي اۊ خۊدأيي کي ترأ بأل زنه تأ قۊبۊلأ بي, تأنه ترأ بأل بزنه کي ويشتري نؤمره-أ فگيري؟ چي ره ضعيفي ورچسبأ تي ذهنˇ جأ پأکأ نۊکۊني؟ أسأ شمرأ وأورسم: تأ هسأ فيکر بۊکۊده-ييد اۊ خۊدأيي کي شمرأ بأل زنه تأ بتأنيد شيمي خۊرد ؤ خۊرأکأ تهيه بۊکۊنيد, هۊ خۊدأيم تأنه شمرأ بأل بزنه کي شيمي زيويشˇ همه-تأ مؤقييتأنˇ دۊرۊن فرأوأني-يأ فأرسيد.
خۊدأيي کي شمرأ بأل زنه تأ ايتأ کۊجدأنه آپأرتمأنأ بيهينيد, هۊ خۊدأ تأنه شمرأ بأل بزنه تأ ايتأ پيلدأنه ويلأ بيهينيد. وأسي ايتأ بأرˇ منفي ورچسبأنأ شيمي ذهنˇ جأ پأکۊنيد. ورچسبأني أشأنˇ مأنستن؛ طلأقأ گيفته, من هلمأله نتأنم ايتأ خؤرم مردˇ ره ببم يأ ايتأ خؤرم زن ببرم. پلف, من هلمأله نتأنم مي هأيکلأ چأکۊنم. مؤعتأد, من هلمأله نتأنم مي اعتييأدأ ترکأ کۊنم. هرتأ ورچسبأ کي وهأليد شيمي ذهنˇ دۊرۊن حأک ببه, هۊ ورچسب به شيمي وأقييت. شۊمأن أ منفي ورچسبأنأ وهأليدي کي شيمي زيويشأ بدسأ گيرد. أن, أصلي-ترين دليلي ايسه کي مردۊم, ويشتري نتأنيدي اعتييأدˇ جأ خلأصأ بيد, چۊنکي اۊشأن, مؤعتأدˇ ورچسبأ قۊبۊل بۊکۊدده. وأقييي جنگ شيمي ذهنˇ دۊرۊنه, أگه شۊمأن قۊبۊل بۊکۊنيد کي مؤعتأديد, مؤعتأدأنˇ مأنستن زيويدي. خألي هأن وسته کي به سر دکفيد اۊ ورچسبأ شيمي ذهنˇ جأ پأکۊنيد. هۊ سأعته خۊدأ گه: تۊ آزأت, پأک ؤ سأقي. لأزيم ني-يه بيس سأل دئه أ ورچسبˇ مرأ بزيوي. مؤثبتˇ ورچسبأنأ اۊشأنˇ مرأ عوض دکش بۊکۊن.
ايتأ جوأنى مي مرأ گب زيي, گؤفتي خأيلي سأله موأد فۊرۊشه. اۊن گۊلأز نۊکۊدي کي أ کأره-يه. تأزه خجأله-يم کشه-يي. اۊن مرأ بۊگؤفته: جؤل, من گۊلأز نۊکۊنم کي أ کأره-يم أممأ, أن تنأ کأري ايسه کي اۊنˇ دۊرۊن مؤفقم. اۊن موأد فۊرۊشˇ ورچسبأ قۊبۊل بۊکۊده بۊ يؤ احسأس کۊدي دئه هيتتأ کأر أنˇ دس بر نأيه. اۊنأ بۊگؤفتم: أگه تۊ تأني موأد بۊفرۊشي پس تأني بأخي چيزأنم بۊفرۊشي, چيزأني کي مردۊم ره بدر بۊخۊره. خۊپۊسه أوردن نوأ. کي ترأ بۊگؤفته کي تۊ فقد تأني موأد بۊفرۊشي؟ کي موأد فۊرۊشˇ ورچسبأ ترأ دۊچکأنه؟ أ ورچسبأ تي ذهنˇ جأ پأکۊن. أگه تۊ خؤرم فۊرۊشنده-يي پس أزرشمندˇ چيزأنأ بۊفرۊش.
شمرأ يأد بمأنه أگه اينفر هرتأ دليلˇ مرأ, ايتأ ورچسب شمرأ بزه, اۊنˇ گب منأت ني-يه, دليل نيبه کي اۊنˇ گب دۊرۊس ببه, ويشترˇ مؤقه-أن مردۊم خأيد شمرأ فأکشد بيجير. شۊمأن أگه اۊشأنˇ گبأنأ محل نۊکۊنيد ؤ خألي شمرأ دفرأزيد خۊدأيأ, اۊن شمرأ به جأجيگأيي فأرسأنه کي شۊمأن دسˇ تنأ هلمأله نتأنستيد فأرسئن. لأزيم ني-يه کي شۊمأن وأخبدأر بيبيد کي شيمي کأر چۊتؤ جۊر بأمؤ, خألي خۊدأيأ بأور بۊکۊنيد. أگه شۊمأن بأور بۊکۊنيد, هممه-چي دسفأرسه. أگه شۊمأن بأور بدأريد, خۊدأ خۊ رحمتأنˇ درأ شمه ره وأکۊنه. مردۊم شمرأ گيدي: تۊ دئه خأيلي سأب بۊکۊده دأري, پۊردأنأ همه-أ بشکنه دأري, أگه شۊمأن أ ورچسبأنأ قۊبۊل بۊکۊنيد اۊ وخت دئه اۊ خؤرم سرنيويشتي کي خۊدأ شمه ره خأستي-يأ فأنرسيدي. خۊدأ گه: من خأيلي بخشنده-يم, اۊنقد کي همه-تأ سأب ؤ خطأيأ بخشم.
خۊدأ گه: من اۊ ايتفأقأني کي تي زيويشˇ دۊرۊن دکفه دأره ؤ عأديلأنه نۊبۊيأ, دۊ برأبر جۊبرأن کۊنم. چي ره سأب بۊکۊده-أنˇ ورچسبأ شيمي ذهنˇ جأ پأکأ نۊکۊنيدي؟ چي ره گۊنأکأر, محکۊم ؤ أشأنˇ مأنستنأ شيمي ذهنˇ جأ پأکأ نۊکۊنيدي يؤ مۊثبتˇ ورچسبأن, ببخشه بؤبؤسته, خۊدأ لؤطف ؤ رحمتأ به دس بأورده-يأ اۊنˇ جأ ننيدي؟ جوأن کي بۊم جينجيرˇ قد ؤ أتيک پأتيک بۊم. وختي بسکتبأل بأزي کۊديم مي هم-تيمي-يأنˇ ويجأ نأقلن سي سأنت پأچ-تر بۊم. هأنˇ وأسي مي هم-تيمي-يأن مي ايسمأ بنأبيد: آغۊزى. هميشک مرأ أتؤ دۊخأديد. سلأم آغۊزى. صؤب به خير آغۊزى. أنˇ دليلم أن بۊ کي آغۊز کۊجدأنه-يه ؤ مي هأيکلم اۊشأنˇ ره اۊنˇ سٚوٚد نيشأنأ دأيي. مۊسأبقه-أنˇ دۊرۊن مي هم-کلأسي-يأن دأد کۊديد: بۊشۊ آغۊزى. اۊشأن منظۊرˇ بدي نأشتيد, خألي شؤخي يؤ خأنده ره أ نأمأ مه ره بنأبيد, أممأ أ ايسم, مي اعتمأدˇ به نفسأ لأ بۊکۊده بۊ. هر دفأ کي أ ايسمأ ايشتأوستيم أ فيکر مي ذهنˇ دۊرۊن دکفتي کي مي قد همه-کسˇ جأ پأچ-تره, من بقأيده بۊلند ني-يم. من أ ورچسبأ قۊبۊل بۊکۊده بۊم ؤ هر رۊز ويشتر خۊپۊسه أورديم ؤ تأم-بزه بۊم, أنˇ وأسي کي أيتأ اۊيتأ مرأ أتؤ دۊخأديد. ايرۊز کأري-يأ بۊکۊدم کي شمرم گم بۊکۊنيد؛ من اۊ منفي ورچسبأنأ مي ذهنˇ جأ پأکۊدم ؤ مي مرأ بۊگؤفتم کي خۊدأ وختي کرأ مرأ خلق کۊدي سأب نۊکۊده, اۊن هدفي دأشتي کي مرأ أتؤ خلق بۊکۊده, دۊرۊسسه کي مي قد تۊمأمˇ مي هم-تيمي-يأنˇ جأ پأچ-تره أممأ, من همه-دأنه جأ ترˇ چسب-ترم. تۊمأمˇ اۊ ورچسبأني کي مرأ خفيفأ کۊدي-يأ مي ذهنˇ جأ پأکۊدم. چن سألˇ پسي, چن مأ دۊرۊن حۊدۊدن بيس سأنت مي قد بۊلندأ بؤسته. هأنˇ وأسي شمرأ گم کي شۊمأن, نأ زييأد بۊلند, نأ زييأد پأچ ؤ نأ زييأد پيريد. خۊدأ شمرأ خلقتˇ شأکأر دۊخأنه. شيمي سرأ رأستأ گيريد ؤ اعتمأدˇ به نفسˇ مرأ بيگيد: من پيله خۊدأ مخلۊقم.
ايتأ اۊ ورچسبأني کي ويشترˇ مردۊم اۊنأ قۊبۊل بۊکۊده دأريد مۊتوسط بؤنه. خأيلي-يأن أييدي مي ويجأ گيدي: جؤل, هيچ چيزˇ خأصصي مي دۊرۊن ننأ, من ايتأ مأمۊلي آدمم, شيش ميليأرد آدمي کي دۊنيأ دۊرۊن ايسأ جأ. شۊمأن ايتأ مأمۊلي زيويشˇ ره خلق نؤبؤستيدي, پيلله-أ بؤنˇ بذر شيمي وۊجۊدˇ دۊرۊن دره, شۊمأن خلق نؤبؤستيد کي بزيويد ؤ بيميريد ؤ هي کسم وأخبدأرأ نبه کي شۊمأن أکه بأمؤييد ؤ أکه بۊشؤييد. خۊدأ شمه ره ايتأ رسألتي دؤجين بۊکۊده دأره کي هلمأله-کس نتأنه اۊ رسألتأ گردن بيگيره. شۊمأن وأستي کأري-يأ به سرأنجأم برسأنيد کي هلمأله-کس نتأنه اۊ کأرأ بۊکۊنه. هي کس نئسأ کي اۊنˇ شخصييت ؤ دک ؤ ديم لأب شيمي مأنستن ببه. ايچي خأص ؤ تأک نهأ کي خألي شيمي شينه ؤ شيمي دۊرۊن نهأ. هيچ وخت مۊتوسط بؤنˇ ورچسبأ قۊبۊل کۊدن نوأييد. أگه بأور بۊکۊنيد کي مۊتوسط ايسيد, مۊتوسطˇ زيويش خأييد دأشتن. أگه بأور بۊکۊنيد کي مأمۊلي-ييد, مأمۊلي زيويش خأييد دأشتن. أتؤيي شيمي عؤمر دوأره ؤ هيتتأ کأرأ به سرأنجأم نرسأنيدي. حأيقت أنˇ کي هيتتأ مأمۊلي چيز شيمي دۊرۊن وۊجۊد نأره ؤ خۊدأ شمرأ خلق بۊکۊده, خۊدأيي کي تۊمأمˇ دۊنيأيأ خلق بۊکۊده دأره, خۊ رۊحˇ جأ شيمي دۊرۊن بدمسته دأره, همه-تأ مخلۊقأنˇ شأيي تأجأ شيمي سر بنأ دأره, شأئأنˇ خۊن شيمي رکأن دۊرۊن دره, شۊمأن سرنيويشتي دأريدي کي وأسي اۊنأ فأرسيد, سرنيويشتي کي حتتأ نتأنيد شيمي ذهنˇ دۊرۊن بأوريد.
أممأ, أگه خأييد هۊني بيبيد کي خۊدأ خأيه, أولي کأري کي وأ بۊکۊنيد أنˇ کي مۊتوسط بؤنˇ ورچسبأ شيمي ذهنˇ جأ پأکۊنيد, مأمۊلي بؤنˇ ورچسبأ پأکۊنيد ؤ خلقتˇ شأکأر ؤ أرزشمند بؤنأ اۊنˇ جأ بنيد. مي خؤرم ريفئق دئل برأؤن, کي بسکتبألˇ ايتأ اۊسطۊره-يي مۊربي ايسه مه ره تأريف بۊکۊده کي ايرۊز چنتأ دأنش آمۊزأنˇ ره سۊخنرأني بۊکۊده. سۊخنرأني کي تۊمأنأ بؤسته ايتأ رئکˇ دأنه کي دۊ متر ؤ ده سأنت قد ؤ صد ؤ بيس کيلؤ وزن دأشتي بأمؤ بۊگؤفته: سلأمˇ آقأىˇ برأؤن, من بسکتبألأ خأيلي دۊس دأرم, أممأ نتأنم زييأد وأز بۊکۊنم ؤ خأيلي زۊد وأوينم ؤ چن دقه دؤوستنˇ پسي وأکفم. دئل برأؤن به سر دکفته اۊنˇ بألأ بيگيره ؤ اۊنأ به خۊ نأجه فأرسأنه. رئکأ بۊگؤفته چن رۊز ديگه ته ره ايتأ تمريني برنأمه نيويسم کي اۊنˇ مرأ تأني تي پأئأنˇ قؤدرت ؤ شق شقˇ ره ايسأنأ زييأدأ کۊني. سه مأ پسي, ايتأ کأغذ اۊ رئکˇ جأ بأمؤ کي اۊنˇ دۊرۊن بينيويشته بۊ آقأىˇ برأؤن, من شيمي برنأمه سر پيش بۊشؤم ؤ هر رۊز چن سأعت مي پأئأنˇ قؤدرتˇ سر کأر بۊکۊدم, أممأ آخربسره أمي مۊربي مي ايسمأ خط بزه, اۊن گه کي من خأيلي پيلدأنه, سۊست ؤ بي چنگ ؤ مۊشتم.
دئل برأؤن اۊنأ آوجأ دأ: جأنˇ زأى, أگه تۊ تي حقˇ سأيأ بۊکۊني يؤ هأتؤ دۊمبأله بدي يؤ خۊدأ جأ بخأيي, اۊن ترأ اۊ جأجيگأيي کي خأيي فأرسي-يأ فأرسأنه. اۊ جوأنˇ رئکˇ دأنه وأسي تصميم بيگيفته-بي کي خأيه اۊ منفي ورچسبأنأ قۊبۊل بۊکۊنه يأ نأ؟ ورچسبأني کي گؤفتيدي: خأيلي پيلدأنه ؤ سۊست ؤ بي چنگ ؤ مۊشته يأ اينکي اۊ ورچسبأنأ فيشأنه ؤ بشه اۊ نأجه-أنأ دۊمبألأ کي خۊدأ اۊنˇ ديلˇ دۊرۊن تأودأ دأره. اۊن به سر دکفته کي منفي ورچسبأنأ فيشأنه. شکيل اؤنيل آخربسره خۊ حقˇ سأىˇ مرأ بۊشؤ ال اس يۊ تيمˇ دۊرۊن کي دئل برأؤن اۊنˇ مۊربي بۊ. اۊن هممه-تأ رکؤردأنأ بشکنه ؤ بؤبؤسته ايتأ بسکتبأليستي کي اۊنˇ مۊجسمه ال اس يۊ ورزشگأ جۊلؤ نهأ. خأيلي تعجۊب بۊکۊدم کي چي بؤستي أگه اۊ جوأنˇ رئکˇ دأنه اۊ منفي ورچسبأنأ قۊبۊل بۊکۊده-بي, أگه وأفکرأ شؤبي کي: ولکم رأس گه, نۊکۊنه خأيلي پيلدأنه ؤ سۊست ؤ بي چنگ ؤ مۊشتم, أتؤيي هيچ وخت اۊنˇ مۊجسمه چأکۊده نؤبؤستي.
کسي تأ هسأ شمرأ بۊگؤفته دأره کي نتأنيد شيمي نأجه-أنأ فأرسيد؟ خۊدأ اۊ نأجه-أ اۊنˇ ديل تأنوأدأ دأره, ولکي اۊنأ شيمي ديل تأودأ دأره. منفي صدأئأن هميشک شيمي نأجه-أنˇ فأرسئنˇ رأشي دۊرۊن درد, أممأ وأخب بيبيد کي خۊدأ نأجه-يي-يأ شيمي ديل تأنوده جه غرز اينکي شمرأ اۊنˇ فأرسئنˇ ره آمأده-أ کۊدي-بي. شۊمأن أسأ هرچي کي شيمي نأجه-أنˇ فأرسئنˇ ره احتييأج دأريدي-يأ دأريدي. ويشترˇ اۊ چيزأني کي فيکر کۊنيدي شمرأ ونأله شيمي نأجه-أ فأرسيد, حئيقت پأايشکيل ني-ييد ؤ منظۊري دأشتي کي شيمي رأسر بأمؤ دأره. خۊدأ دأنه چي کۊدأن دره-يأ. اۊن شمرأ ايجۊر خأص خلق بۊکۊده کي بتأنيد شيمي نأجه-أ فأرسيد. ولکم شکيل اؤنيلˇ مأنستن اينفر شمرأ بگه کي فلأن کأرˇ ره بدر نۊخۊريدي, يأ مۊتخصصأن شمرأ بيگيد کي شيمي نأجه دسفأرس ني-يه أممأ, مۊتخصصأن نى سأب کۊنيدي.چن سأل پيش مۊتخصصأن مي مأرأ بۊگؤفتيد: چن هفته دئه ويشتر زنده ني-يه أممأ اۊن سي ؤ پئن سأله کي جأنˇ سأقي مرأ زيوه. ايتأ عأليمي به ايصطلأ مۊتخصص مرأ بۊگؤفتيدي کي من نتأنم خؤرم سۊخنرأن ببم أممأ اۊشأن سأب بۊکۊديد. مي زيويشˇ دۊرۊن بأمؤختم کي مردۊم تأنيدي ايتأ بأرˇ ورچسب شمرأ دۊچکأنيد أممأ شۊمأن اۊني کي اۊشأن گيدي ني-ييد. ولکم اۊشأن شمرأ بيگيد لمˇ لس, پير, بي چنگ ؤ مۊشت ؤ أشأنˇ مأنستن, أممأ شۊمأن اۊني ايسيد کي خۊدأ شمرأ اۊتؤ دۊخأنه: بأش, بأکلله ؤ تأريخ-سأز.
أگه شؤمأن به سر دکفيد کي منفي ورچسبأنأ شيمي ذهنˇ جأ پأکۊنيد بأور بۊکۊنيد کي ايمرۊ شيمي زيويشˇ دۊرۊن ايتأ خأصˇ رۊزه. أگه شيمي فيکر کۊدنأ بئترأ کۊنيد شيمي زيويشم بئترأ به ؤ أتؤيي بيدي اۊني کي خۊدأ شمرأ اۊنˇ ره خلق بۊکۊده دأره.
(جؤل اۊستين)
