أولي پۊلۊک
شیمي ذهنأ أسرنؤ ديچين وأچين بۊکۊنيد
أمي ذهن کأمپيۊترأ مأنه هرجۊر اۊنأ ديچين وأچين بۊکۊنيم هۊتؤ کأر کۊنه. شۊمأن تأنيد ايتأ کأمپيۊتري بدأريد آخري فنأوري-يأنˇ مرأ. سري-ترين مؤدل, ويشتري حأفظه مرأ. أممأ أگه اۊنˇ سر ايتأ نرم أفزأري نصب بۊکۊنيد کي خرأب ببه, خؤب کأر نۊکۊنه ؤ اۊنˇ سخت أفزأرˇ جأيم زييأد نتأنيد ايستفأده بۊکۊنيد. وختي خۊدأ شمرأ خلق بۊکۊده بۊگؤفته: أشرفˇ مخلوقأنأ خلق بۊکۊدمه. شيمي سخت أفرأز هيچ عأيبي نأره, شمرأ ايتأ بأرˇ استعدأد فأدأ بؤبؤسته دأره. عيلأوه-يه اۊن هۊ أول-سر خۊدأ شمرأ ايجۊر خلق بۊکۊده دأره کي شيمي زيويش, جأنˇ سأقي ؤ مؤحبت ؤ قؤدرتˇ جأ بتپسته ببه.
أشأني کي ايسٚم ببردم شيمي وۊجۊدˇ دۊرۊن حأک بؤبؤسته بۊ. تۊ تأني هر کأري-يأ أنجأم بدي. تۊ هرتأ کأرأ دس بزني, ته ره دأشتˇ دأرأيي ؤ مؤفقيت أوره. تۊ ايتأ برنده آدمي, نأ ايتأ دبأخته آدم. شيمي خألق شمرأ دأشتˇ دأرأيي ؤ فرأوأني ره, مؤفقيت ؤ زيويشي کي اۊنˇ دۊرۊن ايمأنˇ جأ بتپسته ايسه ره طرأحي بۊکۊده بۊ. فرض بۊکۊنيد اۊ قؤدرتمندˇ کأمپيۊتر ايتأ نرم أفزأري کي مۊنأسب ايسه بدأره, أممأ, به هر دليلي اۊ نرم أفزأر ويرۊسي ببه, چن وختˇ پسي کأمپيۊترˇ سؤرعت بيجير أيه. مؤشکل أن ني-يه کي اۊ کأمپيۊترˇ نرم أفزأر ضعيفه, مؤشکل أنˇ کي اۊنˇ سخت أفزأر آلۊده-أ بؤسته دأره.
پس تأنيم بيگيم أگه زيويشي کي فرأوأني جأ بتپسته ايسه-يأ تجرۊبه نۊکۊنيم أنˇ وأسي-يه کي أمي نرم أفزأر آلۊده-أ بؤسته دأره. أيتأ اۊيتأ أمرأ بۊگؤفته دأريد کي تۊ نتأني مؤفق بيبي. تۊ بي استعدأدي. تۊ هيچ وخت نتأني تي اعتيأدأ ترکأ کۊني. تۊ خۊشگيل نيئي. تۊ بي چنگ ۊ مۊشتي. تي آينده تأريکه. أ گبأن أمي ذهنأ کي ايتأ نرم أفزأرأ مأنه-يأ آلۊده-أ کۊده دأريد. هأنˇ وأسي أمأن بيدۊنˇ اعتمأد به نفس گب زنيمي. هميشک کأبأسي أمرأ گيم ؤ بأور نأريم کي أمي نأجه-أنأ فأرسيم. أممأ خؤرم خبر أنˇ کي شيمي ذأت هيچ مؤشکلي نأره. شيمي ذأت هأنده کأمل ؤ بيدۊنˇ عأيبه ؤ اۊ کأمپيۊترˇ مأنستن شيمي سخت أفزأر سأليمه ؤ مؤشکل, خألي اۊ نرم أفزأري ايسه کي نصب بؤبؤسته. تنأ کأري کي وأسي بۊکۊنيد أنˇ کي هرچي زۊتر ويرۊسي نرم أفزأرأنˇ جأ خلاصأ بيد.
رۊزأن شمرأ أتؤ دۊخأنيد کي خۊدأ شمرأ دۊخأده: من برکت بدأ بؤبؤسته-يم, من قوي ايسٚم, من سأليم ايسٚم, من اعتمأد به نفس دأرم, من خأيلي خۊشگيلم, من أرزشمندم. شۊمأن وأسي تۊمأمˇ اۊ ويرۊسي نرم أفزأرأنˇ جأ خلأصأ بيد. جخترأ نديد أگه شيمي فکرأن محدۊد ببه شيمي زيويشم محدۊدأ به. خؤرم زيويش خؤرم فيکرأنˇ جأ أيه. أنˇ وأسي کي ويرۊسي نرم أفزأرأنˇ جأ خلأصأ بيم وأ بأمؤجيم چۊتؤ حذفأ کۊدنˇ پۊلۊکأ دخشأريم.
هر وخت منفي ؤ نأاۊميدأ-کۊنˇ صدأئأن أمي ذهنˇ دۊرۊن دکفته وأ زۊتر اۊنأ حذفأ کۊنيم. اۊ منفي فيکرأن گيدي: تي خؤرم رۊزأن دئه تۊمأنأ بؤسته بزين دئه فقد کأبأسي أوري. هأتؤ أ فيکرأن دکفته شيمي ذهنˇ دۊرۊن وأسي وأخبأ بيد کي أ ويرۊسي فيکرأن خأييدي شمرأ شيمي سرنيويشتˇ جأ دۊرأ کۊنيد.
أسأ أ فيکرأنˇ مرأ جنگستنˇ ره چي وأ کۊدن؟ سأدده-يه, اۊنأ حذفأ کۊنيد ؤ شيمي مرأ بيگيد: من هيچ وخت أ منفي فيکرأ قۊبۊل نۊکۊنم, خۊدأ مرأ وعده بدأ کي هرچي ويشتر مي سرنيويشتˇ سر پيش بشم, مي خؤرم زيويشأ نيزيک-ترأ بم. منفي فيکر گه: تۊ خؤبأ بؤستني نيئي, تي آزمأيشأنˇ آوج خؤب ني-يه. فيلفؤر اۊنأ حذفأ کۊن ؤ اۊنˇ جأ بۊگۊ: خۊدأ مي جأنˇ سأقي-يأ مرأ وأگردأنه ؤ تۊمأمˇ أ سختˇ رۊزأنأ, خؤرمˇ رۊزأنˇ مرأ عوض دکش کۊنه. منفي فيکر گه: هيچ وخت تي نأجه-أنأ فأنرسي, بقأيده استعدأد نأري, اۊ ايمکأنأتي کي وأسي بدأري تأ تي نأجه-أنأ فأرسي-يأ نأري. أ فيکرأ هۊ سأعته حذفأ کۊن ؤ بۊگۊ: من هأچينه خلق نؤبؤستم, خۊدأ خۊ نعمتأنأ هميشک مرأ فأده, هرتأ کأرأ دس بزنم مي دأشت ؤ دأرأيي زييأدأ به ؤ مؤفقأ بم.
منفي فيکر گه: تۊ نتأني تي اعتيأدأ ترکأ کۊني, تي پئر ؤ مأرم هأ مؤشکلأ دأشتيد, اعتيأد تي سرنيويشته. اۊ فيکرأ حذفأ کۊن ؤ بۊگۊ: خۊدأ مرأ آزأت خلق بۊکۊده ؤ من ايتأ آزأتˇ آدمم. أگه خأييد شيمي توأنأيي-يأن ويشترأ به وأسي تأ اۊيأ کي تأنيدي حذفأ کۊدنˇ پۊلۊکأ دخشأريد. من وختي کي به سر دکفتم ايتأ سۊخنرأن ببم اۊ منفي فيکرأن مرأ گؤفتيدي: جؤل, تي کأر ني-يه, تۊ حله جوأني, تجرۊبه نأري, أصن نأني چي سر وأ گب بزني. اۊ مؤقه رأحت تأنستيم أ ويرۊسي فيکرأنأ وهألم کي مي زيويشأ کؤنتؤرؤل بۊکۊند ؤ مرأ ونألد کي مي سرنيويشتأ فأرسم. من هۊ کأري-يأ بۊکۊدم کي أسأ شيمي جأ خأيم بۊکۊنيد: حذفأ کۊدنˇ پۊلۊکأ دخشأريد.
أ فيکرأنأ هممه-أ پأکۊدم: تۊ نتأني, تۊ حله جوأني, تۊ بي تجرۊبه-يي, اؤضأ اۊتؤيي کي تۊ خأيي پيش نيشه. أگه اۊ زمأت اۊ ويرۊسي فيکرأنأ پأکأ نۊکۊدي-بيم, هيچ وخت نتأنستيم أ جأجيگأيي کي فأرسئمأ فأرسم. کيتأبˇ مؤقدس ايشتأو ديهه کي شيمي ذهنأ بپأييد. شۊمأن شيمي ذهنˇ وۊرۊدي کؤنتؤرؤلأ دأريدي. شۊمأن تأنيدي تۊمأمˇ اۊ منفي فيکرأنأ دۊچکيد يأ اينکي اۊشأنأ حذفأ کۊنيد ؤ خۊدأ بۊگؤفته-أنأ کي شمه ره بۊگؤفته-يأ اۊنˇ جأ بنيد. أگه اۊ مسمۊمˇ فيکرأنأ وهأليد کي هر سأعت دقه شيمي ذهنˇ دۊرۊن پخشأ بيد, شيمي اعتمأد به نفس ؤ عزتˇ نفسأ آلۊده-أ کۊنيدي. اۊ منفي فيکرأني کي شيمي ذهنˇ دۊرۊن أيه-يأ دۊچکستن نوأييد. أ منفي فيکرأن هۊشأني ايسيد کي خأييد شيمي ذهنأ مسمۊمأ کۊنيد.
أگه اينفر بتأنه شيمي ذهنأ کؤنتؤرؤل بۊکۊنه تأنه شيمي زيويشأ خۊ دس بيگيره. أگه شيمي فيکرأن منفي ؤ سرفۊکؤ-زن ايسه, اۊشأنأ دۊچکستن نوأييد, اۊشأنأ حذفأ کۊنيد. وأسي وأخبدأر بيبيد کي چي گيدي. أگه شيمي مرأ گيدي کي استعدأد نأرمه شک کۊدن نوأييد کي نتأنيد شيمي نأجه-أنأ فأرسيد. أگه شيمي مرأ فيکر بۊکۊنيد کي خۊشگيل ني-ييد اۊ فؤرصتأنأ کي تأنيد خؤرم آدمأنأ بيدينيدأ جه دس ديهيدي. أگه شيمي مرأ فيکر بۊکۊنيد کي تأ اۊيأ کي تأنستيم دئه پيشرفت بۊکۊدم, هلمأله پيشرفت نۊکۊنيدي. أ مؤضۊ دليل أن ني-يه کي شيمي پيشرفتˇ ره محدۊديت نهأ, ولکي, شۊمأن شمرأ هأچينه فيکرأنأ مرأ رضأ بۊکۊديد.
خؤرم خبر أنˇ کي هيچ وخت دئر ني-يه, هأني وخت دأريدي اۊني کي خأييد, بيبيد. فسک أنه: شيمي ذهنأ أيتأ اۊيتأ مسمۊمˇ گبأنأ جأ خألي-يأ کۊنيد. شۊمأن اۊني ني-ييد کي مردۊم گيدي, شۊمأن اۊني ايسيد کي خۊدأ بۊگؤفته. شيمي ذهنأ اۊ گبأنˇ جأ کي سأبق مٚدٚرسه مۊشأور شمرأ بۊگؤفته کي چئه دأنم, تي درز ضعيفه, تۊ نتأني تي مدرکأ فأگيري جأ خألي-يأ کۊنيد. أ گبأنأ شيمي ذهنˇ جأ پأکأ کۊنيد. شۊمأن تأنيد ايتأ مؤفقˇ محصل بيبيد. وأبرأزئنˇ بذر شيمي وۊجۊدˇ دۊرۊن نهأ. أگه نأمزۊد يأ شيمي سأبقˇ مردأى يأ زنأى شمرأ بۊگؤفته دأره کي تۊ خۊشگيل نيئي, بقأيده خؤرم آدم نيئي, أ گبأ حذفأ کۊنيد. شۊمأن شأکأريد, شۊمأن خۊشگيل ؤ ديلخأ ايسيد ؤ ايدأنه-ييد. ايتأ گۊزأرشأ خأندأن دۊبۊم، اۊ زأکأنˇ شين بۊ کي مٚدٚرسه دۊرۊن أشأنأ اذئت بۊکۊده بيد.
اۊنˇ دۊرۊن بينيويشته بۊد کي وختي أ زأکأن پيلله-أ بؤسته بيد اۊ سر به سر نهأنأن ؤ دس بأزأرأ گيفتنأن, أشأنˇ سر مأله بنأ بۊ. کسي کي أ گۊزأرشأ بينيويشته بۊ ايتأ اۊ زأکأني کي هسأ چئل سأله بۊ مرأ گب بزه بۊ. اۊ آدم به نظر خأيلي بأکله أمؤيي ؤ أنˇ توأنأيي-يأنم زييأد بۊ, أممأ, نتأنستي خۊ کأر ؤ زيويشˇ دۊرۊن خؤب عمل بۊکۊنه ؤ أسير أبير بۊ. اۊن تعريف کۊدي کي أنˇ همکلاسي-يأن أنأ چۊتؤ دۊخأديد: دبأخته, بي چنگ ۊ مۊشتأنˇ مأنستن. اۊن وهأشته بۊ أ کلمه-أن أنˇ ذهن دۊرۊن کۊنه بۊکۊند ؤ أتؤيي چن سألˇ پسي, أنˇ زيويش پأک لأتوأرأ بؤسته بۊ. وختي اينفر شمرأ ايتأ خأصˇ کلمه أمرأ دۊخأنه اۊ کلمه شيمي ذهنˇ دۊرۊن بکأشته به. أسأ دئه شيمي پأيه کي وهأليد اۊ دأنه کۊنه بۊکۊنه ؤ ببه شيمي وأقييت, يأ اينکي اۊ دأنه-أ هأني کۊنه نۊکۊده دۊخۊشکأنيد.
وختي کي شۊمأن اۊ کلمه-أنأ دۊچکيد أنأ مأنه کي کرأ اۊ دأنه-أ آب دأن دريد, آخربسره اۊشأن شمه ره بيدي ايتأ وأقييت. هأنˇ وأسي-يه کي تأکيد کۊنم وأسي شيمي فيکرأنأ بپأييد. أگه أيتأ اۊيتأ شمرأ گيدي تۊ بأکله ايسي, تۊ تأني پيله پيله کأرأنأ بۊکۊني, خأيلي خؤبه کي أ مؤثبتˇ فيکرأنأ آب بديد. أ خؤرم گبأن کي أيتأ اۊيتأ شمرأ بۊگؤفتيدي-يأ وأخأنيد ؤ به اۊشأن فيکر بۊکۊنيد کي آخربسره ببه شيمي وأقييت. أممأ مۊتأسفأنه ويشترˇ مؤقه-أن أمأن, مردۊمˇ منفي گبأنأ دۊچکيم. أيتأ اۊيتأ نتأنيد کأري بۊکۊنيد أن شۊمأنيد کي بأعيث بيدي أ منفي بذرأن جأن بيگيريد ؤ کۊنه بۊکۊنيد. اۊشأن خألي تأنيدي أ بذرأنأ بکأريد, أن شۊمأنيد کي گيدي کؤيتأ بذرأن تأنيد پيله-أ بيد ؤ کؤيتأ بذرأن هۊ سأعته وأ دۊخۊشکيد.
ويشترˇ مؤقه-أن أمأن أيتأ اۊيتأيأ مۊقصر دأنيم ؤ گيم: اۊشأن بيد کي مرأ رخشنأ گيفتيد, اۊشأن بيد کي مرأ سرفؤکؤ بزه-ييد. شۊمأن نتأنيد کسي-يأ کؤنتؤرؤل بۊکۊنيد, أممأ شيمي ذهنأ کي تأنيد کؤنتؤرؤل بۊکۊنيد. أيتأ اۊيتأ منفي گبأنأ دۊچکستن نوأييد, اۊشأنˇ گبأنأ شيمي ذهنˇ دۊرۊن وأخأندن نوأييد. وختي کي شيمي ذهن, ايمأن ؤ اۊميد ؤ خؤرم فيکرأنˇ جأ بتپسته ببه, أ فيکرأن بيدي شيمي وأقييت. دأنيدي چي ره چئل سألگي دۊرۊن مۊشکيلأن اۊ مردأکأ اۊپئخته بۊد؟ اۊن مردۊمˇ منفي گبأنأ تۊمأمˇ أ سألأن, خۊ ذهنˇ دۊرۊن وأخأندن دۊبۊ. هر دفأ کي اۊن به أ گبأن فيکر کۊدي, کرأ اۊ بذري کي خۊ ذهنˇ دۊرۊن بکأشته بۊيأ آب دأيي. آدم نأرأحتأ به, أممأ آخربسره اۊ بذرأن کۊنه بۊکۊديد ؤ وختي پيلله-أ بؤسته اۊنˇ زيويشأ بي پأ بۊکۊديد. حئيقت چي بؤستي أگه اينفر اۊنأ بأمؤختي-بي کي خۊ فيکرأنأ بپأيه ؤ خۊ مرأ بگه: من شأکأرم, من خأيلي استعداد دأرم, پيلله-أ بؤنˇ بذر, مي وۊجۊدˇ دۊرۊن دره.
شيمي ذهنˇ دۊرۊنم جغلگي تأ هسأ ويرۊسي فيکرأن جۊخۊفته دأره؟! شۊمأن اۊ ويرۊسي بذرأنأ وهأشتيد کي شيمي ذهنˇ دۊرۊن کۊنه بۊکۊند؟! أمأن هيچ وخت نتأنيم أيتأ اۊيتأ منفي فيکرأنˇ جۊلؤيأ بيگيريم, أممأ, تأنيم دؤجين بۊکۊنيم کي اۊ گبأنأ دۊچکيم يأ دۊنچکيم! ايتأ مردأکˇ مرأ گب زييم کي أنˇ پئر هميشک کأبأسي مرأ گؤفتي. أنˇ پئر هميشک اۊنأ سرفۊکؤ زيي ؤ اۊنأ گؤفتي کي بي چنگ ؤ مۊشته ؤ هيتأ کأر أنˇ دس بيرۊن نأيه. تعجۊبي ني-يه کي اۊن تأ بيس سألگي هيتأ کأرأ به سرأنجأم نرسأنه بۊ يؤ هيچ هدفي نأشتي. اۊن نتأنستي ايتأ کأرˇ دۊرۊن بئسه ؤ اۊنˇ رأبطه-أن مؤشکل دأشتي. اۊن گؤفتي أنˇ پئرˇ گبأن هر سأعت دقه أنˇ ذهنˇ دۊرۊن وأگۊيأ به کي: تۊ نتأني مؤفق بيبي. حتتأ أنˇ پئر مردنˇ مؤقه-يم اۊنأ ايشتأو بدأ بۊ کي تۊنؤ تي برأر هيچي نيبيدي. أن آخري جۊمله-يي بۊ کي خۊ پئرˇ جأ بيشتأوسته بۊ. سألأنˇ سأل اۊن أسير أبير بۊيؤ خؤرأ ايتأ شأليکي آدم ديي. أن همه بدبختي همه-دأنه اۊ منفي گبأنˇ جأ بۊ کي اۊنأ بأور بأمؤ بۊ. ايرۊز اۊن نأخبره مي گبأنأ بيشتأوسته کي بۊگؤفتم: بپأييد کي منفي فيکرأن شيمي ذهنˇ دۊرۊن رأ وأنکۊند ؤ شيمي پيشرفتˇ جۊلؤيأ نيگيرد.
اۊن وأخبأ بؤسته کي أن همه سأل أنˇ پئرˇ گبأن ونأشته اۊن پيشرفت بۊکۊنه. اۊن بينأ کۊده اۊ منفي برنأمه-أنأ حذفأ کۊدن کي اۊنˇ ذهنˇ دۊرۊن حأک بؤبؤسته بۊ. اۊن خۊ ذهنˇ نرم أفزأرأ أسرنؤ ديچين وأچين بۊکۊده. وختي کي ايتأ منفي فيکر أنˇ ذهنˇ دۊرۊن رأ وأکۊدي کي گؤفتي: تۊ هيتأ کأرˇ ره به در نۊخۊري, تۊ هيتأ کأرأ نتأني تۊمأنأ کۊني اۊن أ منفي فيکرأ أ مؤثبتˇ فيکرˇ مرأ عوض دکش کۊدي کي: تۊ تأني أ کأرأ بۊکۊني ؤ بي, هۊني کي اۊنˇ ره بۊدۊنيأ بأمؤ دأري. ايمرۊ اۊن ايتأ مؤفقˇ آدمه ؤ ايتأ خؤرم خأنوأده دأره ؤ هميشک مي همأيشأنˇ دۊرۊن شرکت کۊنه. اۊ سأعته کي به سر دکفته همه-چي-يأ أسرنؤ ديچين وأچين بۊکۊنه, أنˇ زيويش پأک أرۊ اۊرۊ بؤبؤسته. مۊمکينه شۊمأنم اۊنˇ مأنستن بيبيد ؤ ايتأ خؤرم پئرˇ دأشتنˇ نأجه-أ بدأشتي-بيد, أممأ, مۊهيم ني-يه, کي أ منفي بذرأنأ شيمي ذهنˇ دۊرۊن بکأشته, أسأ, خأيه شيمي پئر ببه, شيمي ريفئق ببه يأ شيمي آشنأيأن. بيلکؤل, شۊمأن تأنيد اۊ گبأنأ هممه-أ حذفأ کۊنيد ؤ شمرأ أسرنؤ ديچين وأچين بۊکۊنيد. مۊمکينه مردۊم بخأيد شمرأ سرفۊکؤ بزند ؤ بخأيد شۊمأن شمرأ ايتأ شأليکي آدم بيدينيد. اۊشأنˇ گبأن, شيمي ذأتأ أرۊ اۊرۊ نۊکۊنه. شۊمأن هأنده خۊدأ چۊمˇ سۊييد, خۊدأ ره ايتأ أرزشمندˇ دأشتˇ دأرأيي ايسيد ؤ خۊدأ ايتأ خؤرم آينده شيمي رأفأ بنأ دأره. أممأ, شيمي دس دره کي وهأليد أيتأ اۊيتأ منفي گبأن شيمي آينده-أ محدودأ کۊنه يأ نأ. أن هميشک شمرأ يأد بمأنه کي أصلي جنگ شيمي ذهنˇ دۊرۊنه.
ايتأ زنأکأ ايشنأختيم کي خأيلي سأل بۊ خۊ عيزتˇ نفسˇ مرأ مؤشکل دأشتي. اۊن خؤرأ زييأد تحويل نيگيفتي, اۊن اي جيگأ پيلله-أ بؤسته بۊ کي اۊنأ زييأد محل ننأييد. اۊنˇ پئر ؤ مأر کس کسه مرأ ايزدوأج نۊکۊده بيد ؤ اۊن بيجˇ زأى بۊ. ايرۊز اۊن هۊ زأکي دۊرۊن خۊ بزأ رۊزˇ کأغذأ بيده کي اۊنˇ سر بينيويشته بۊ: بيج.
أ کلمه أنˇ ذهنˇ دۊرۊن حأک بؤبؤسته بۊ يؤ خۊ جوأني دۊرۊن هر دفأ کي خأستي بينأ کۊنه ايتأ کأرأ کۊدن, أنˇ ذهنˇ دۊرۊن وأخأنده بؤستي کي: تۊ سأبي, هي کس ترأ نخأستي, تۊ شأليکي-يي. أ منفي فيکرأن اۊنأ بأور بأمؤ بۊ يؤ أ منفي فيکرأن بؤبؤسته بۊد اۊنˇ شخصيت. ايرۊزه اۊن وأخبأ بؤسته کي أمي أرزستنأ مردۊم تعيين نۊکۊنيدي, ولکي خۊدأيه کي گه: کي أرزه کي نييأرزه. اۊن بۊگؤفته: أ وأخبأ بؤستن, ايجۊر, دۊرۊنˇ جأ مؤنفجرأ بؤستنˇ مأنستن بۊ. هۊ سأعتˇ پسي اۊن به سر دکفته هرسأعت دقه خؤرأ بگه کي: من سأب ني-يم, من هأتؤ کترأيي أ دۊنيأ نأمؤم, خۊدأ مرأ ايتأ پيلدأنه هدفˇ ره خلق بۊکۊده دأره, خۊدأ مرأ تأييد بۊکۊده دأره, من أرزشمندم. اۊ رۊزˇ پسي اۊنˇ زيويش دئه پأک أرۊ اۊرۊ بؤبؤسته, آهأ, اۊنˇ زيويش, بئترأ بؤسته, چۊنکي, اۊنˇ فيکر کۊدن بئترأ بؤسته.
أ سألأنˇ دۊرۊن بفأمستم کي هر وخت اينفر بخأيه ايتأ کأرأ بأور بدأره ؤ اۊ کأرأ بۊکۊنه, هميشک کسأني ايسأييد کي بخأييد خۊشأنˇ گبأنˇ مرأ, اۊنˇ ذهنأ مسمۊمأ کۊنيد. ويشترˇ مؤقه-أن اۊشأنˇ نييت بد ني-يه, فيکر کۊنيدي کي شيمي خؤبي-يأ خأييدي. اۊشأن شمرأ ايشتأو ديهيدي کي چي ره شۊمأن نتأنيد اۊ کأرأ بۊکۊنيد. مثن گيدي: مي برأر هأ کأرأ بۊکۊده مؤفق نؤبؤسته. تۊمأمˇ أشأنˇ گبأن, خأيه بگه کي شيمي هدفأ فأرسئن نتأنيد, أممأ, شمرأ يأد بمأنه کي خۊدأ, اۊ هدفˇ فأرسئنأ اۊشأنˇ ديلأ تأنودأ, ولکي, اۊنˇ فأرسئنأ شيمي ديلأ تأودأ. پس ونأليد هلمأله أيتأ اۊيتأ منفي گبأن شيمي سرنيويشتأ محدۊدأ کۊنه. أصلي جنگ شيمي ذهنˇ دۊرۊنه. أگه شۊمأن شيمي ذهنˇ دۊرۊن جنگأ دبأزيد, بيرۊنم دبأزيدي. هأنˇ وأسي وأ شيمي ذهنˇ ويرۊسأنأ همه-أ بشنأسيد ؤ اۊشأنأ حذفأ کۊنيد.
زأکأنأ وختي هأني جغله-ييد فأندريد, اۊ ذؤقي کي زيويشˇ ره دأريدي تأمشأ, خأيلي جأليبه. اۊشأن پيله پيله نأجه-أن دأريدي. اۊشأن خأييدي دأنشمند, فضأنورد, ورزشکأر يأ حتتأ رييس جۊمهۊر بيبيد. اۊشأن هيچ وخت احسأس نۊکۊنيدي کي نتأنيد ؤ بأور دأريدي کي هرتأ کأرأ بخأييد تأنيد بۊکۊنيد. أ ذؤقي کي نشأ وأشکأفتنˇ دليل أنˇ کي, تأزه خألقˇ جأ بأمؤده زيمينˇ سر. هأني أشأنˇ ذهن آلۊده-أ نؤبؤسته, أممأ, زمأت کي دوأره, أشأنˇ ذهن ايپچه ايپچه جأمعه جأ أسرنؤ ديچين وأچين به. أشأنˇ دؤر ؤ وري-يأن أشأنأ ايشتأو ديهيدي کي چي کأرأني-يأ نتأنيد بۊکۊنيد. ورزشˇ مۊربي گه: تۊ بقأيده خؤب نيئي. تۊ پأچي. خۊشأنˇ ريفئقأ دينيدي کي خۊشگيلˇ ديم دأره يؤ همه اۊنأ دؤرأ کۊنيدي يؤ احسأس کۊنيدي کي خۊشگيل ني-يد. أ ايتفأقأن همه-دأنه بأعيث بيدي کي أشأنˇ نظر خۊشأنˇ هؤويتˇ جأ وأگرده ؤ ايپچه ايپچه خۊشأنˇ پيلدأنه نأجه-أنأ بيخيألأ بيدي يؤ خۊشأنˇ مرأ فيکر کۊنيدي کي من هيچ وخت نتأنم پيله پيله کأرأن بۊکۊنم, من استعدأد نأرم, من خألي ايتأ هأچينه آدمم. أ مؤقه-أن وأسي أمي جأ وأورسيم: حئيقت, چي ره من أتؤ فيکر کۊنم؟! کي مي ذهنأ أتؤ ديچين وأچين بۊکۊده کي, ايتأ هأچينه آدم ببم؟! کي مي ذهنأ أتؤ ديچين وأچين بۊکۊده کي, مي نأجه-أنأ وأ بدم؟!
أ محدۊد ˇفيکرأن کؤيأ جأ بأمؤ دأره؟! به أ محدۊدˇ فيکرأن اۊ جأيي کي زيويستيمˇ جأ بأمؤ بي؟! مۊمکنه ايتأ محدۊدˇ زيويش شيمي دؤر ؤ وري-يأنˇ ره مۊهيم نبه, مۊمکينه شيمي خأنوأده هميشک کأبأسي مرأ بيگيد, مۊمکينه هيتأ شيمي ريفئقأن, ايتأ پيلدأنه نأجه ندأشتي-بيد, مۊمکينه اۊشأن هلمأله ايتأ پيله کأرأ خۊشأنˇ زيويشˇ دۊرۊن به سرأنجأم نرسأنه-بيد. أ دليلأن هيدأنه بأعيث نيبيدي کي شۊمأن ايتأ هأچينه آدم بيبيد ؤ ايتأ محدۊدˇ زيويش بدأريد. خألي أنˇ وأسي کي شيمي خأنوأده دۊرۊن ويشتري اعتيأد دأريدي, دليل نيبه شۊمأنم مؤعتأد بيبيد. خۊدأ شمرأ خلق بۊکۊده کي ايتأ نأمحدۊدˇ زيويش بدأريد, ايتأ زيويشي کي اۊنˇ دۊرۊن آزأتي ؤ جأنˇ سأقي جأ بتپسته ببه. وأزيوستن شيمي دۊرۊن جۊخۊفته-يه, پس, بينأ کۊنيد شيمي ذهنأ أسرنؤ ديچين وأچين کۊدن. أن ايتفأقي ايسه کي مي پئرˇ ره دکفته: اۊن فقيرˇ محله دۊرۊن پيلله-أ بؤسته بۊ. اۊنˇ جغلگي, اقتصأد فلجأ بؤسته بۊ. اۊنˇ پئر ؤ مأرˇ دس خألي بۊ يؤ نتأنستيد اۊنˇ مٚدٚرسه پۊلأ فأديد. مي پئرˇ ذهن, بي پۊلي, دبأختن, هأچينه بؤنˇ ره ديچين وأچين بؤبؤسته بۊ. خۊ مرأ فيکر کۊدي, مي زيويش هأنه. أمأن ايتأ دبأخته ؤ ندأرˇ خأنوأده-ييم. أممأ, 17 سألگي دۊرۊن اۊن بينأ کۊده خۊ ذهنأ تغيير دأن. خۊ ذهنˇ تأن ايچي گؤفتي: تۊ ايچي ره, اۊني کي ايسي جأيم ويشترˇ ره خلق بؤبؤسته دأري, نوأ تأ آخرˇ عؤمر ندأري دۊرۊن بئسي.
پيلله-أ بؤنˇ بذر بينأ کۊده أنˇ دۊرۊن وأج أمؤن. خۊ مرأ فيکر بۊکۊده دۊرۊسسه کي هسأ مي وضعˇ اؤضأ خؤب ني-يه, أممأ, بينأ ني-يه هميشک هأتؤ بمأنه. دۊرۊسسه کي هسأ دبأخته-أنأ مأنم, أممأ, هميشک دبأخته نمأنم. من خۊدأىˇ قأدر ؤ مۊتعالˇ مخلۊقم. اۊن هر رۊز ايپچه خۊ منفي فيکرأنأ پأکۊدي کي گؤفتيدي: تي آينده رؤشنأ ني-يه. اۊ فيکرأني کي اۊنأ به يأد أورديد کي ندأرˇ آدمه. اۊ فيکرأني کي اۊنأ گؤفتيد تۊ مدرسه-أ تۊمأنأ نۊکۊدي. تۊ نتأني هيچي به دس بأوري. اۊن أ فيکرأنأ پأکۊده ؤ خۊ مرأ بۊگؤفته: دۊرۊسسه کي من هيتأ رأيأ نأنم, أممأ, خۊدأ ايتأ بأرˇ رأ دأنه. اۊن درأني-يأ مه ره وأکۊنه کي هلمأله-کس نتأنه اۊشأنأ دوده. اۊن خؤرم آدمأنأ مي رأ سر أوره. اۊن, خۊ ذهنأ فيکرأني کي ايمأن ؤ اۊميدˇ جأ بتپسته بۊ مرأ بۊمبأرأن بۊکۊده. اۊنˇ فيکر کۊدن بئترأ بؤسته, هأنˇ وأسي, بتأنسته خؤرأ ندأري جأ جيويزأنه ؤ خۊ خأنوأده وضعيتأ سأمأن بده.
مۊمکينه شۊمأنم مي پئرˇ مأنستن اي جيگأ پيلله-أ بؤسته-بيد کي مۊنأسب نۊبۊ, کي شيمي اۊلگۊ کسأني بيد کي فقير ؤ بي اعتمأد به نفس بيد. هلمأله فيکر نۊکۊنيد کي شۊمأنم وأ اۊشأنˇ دۊمبأله بيبيد, خۊدأ خأيه کي محدۊديتأنأ ديمه بنيد. هأنˇ وأسي أول وأ اۊ ويرۊسي فيکرأنˇ جأ خلأصأ بيد. اۊشأنأ شيمي ذهنˇ جأ پأکۊنيد. أگه شۊمأن بتأنيد شيمي ذهنأ أسرنؤ ديچين وأچين بۊکۊنيد, همه-تأ کمبۊدأن ؤ محدۊديتأن کنأر شيدي يؤ فرأوأني يؤ دأشتˇ دأرأيي-يأ أوريد شيمي زيويشˇ دۊرۊن. شيمي ذهنأ همه-تأ منفي فيکرأنˇ جأ پأکۊنيد ؤ آمأده-أ بيد کي خۊدأ لؤطف ؤ رحمتأ جذب بۊکۊنيد. وختي کي کأرل لۊييس اؤلمپيکˇ مؤسأبقه-أنˇ ره آمأده-أ بؤستن دۊبۊ, مۊتخصصأن همه-دأنه گؤفتيدي کي هي-کس نتأنه سي فۊت ويشتر وأز بۊکۊنه. دأنشمندأنˇ عيلمي وأرسي-يأنˇ گيدي کي هي کس نتأنه هأنقدچي وأز بۊکۊنه. ايرۊز ايتأ خبرنيگأر کأرل لۊييسˇ جأ وأورسه کي: تي نظر مۊتخصصأنˇ گبˇ جأ چيسه؟ اۊن آوجأ دأ: آهأ, من اۊشأنˇ نظرأنأ بيشتأوسته دأرم, أممأ, اۊشأنˇ گب مه ره منأت ني-يه. هۊ سأله اؤلمپيکˇ مۊسأبقه-أنˇ دۊرۊن, اۊن, سي فۊتˇ رکؤردأ بزه.
أسأ, شۊمأن وهأليدي أيتأ اۊيتأ منفي گبأن شيمي هۊنقدچي توأنأيي-يأنأ محدۊدأ کۊنه؟! چي ره شۊمأن کأرل لۊييسˇ مأنستن مردۊمˇ منفي گبأنأ وأ نديدي. آخري گبأ خۊدأ زنه. اۊن هيچ وخت شمرأ وعده-يي نده ؤ نأجه-يي شيمي ديلˇ دۊرۊن تأنوده, جه غرز اينکي بدأنه شۊمأن تأنيد اۊ کأرأ بۊکۊنيد. کأبأسي آدمأنˇ گبأنأ شيمي ذهنˇ جأ پأکۊنيد. نأاۊميدأ کۊنˇ گبأنأ فيشأنيد. منفي گۊزأرشأنأ نديد بيگيريد. کي بۊگؤفته شۊمأن نتأنيد مؤفق بيبيد؟! کي بۊگؤفته شۊمأن ضعيفˇ دأنشجۊ ايسيد؟! کي بۊگؤفته شۊمأن بقأيده بأکله ني-ييد؟! من شمرأ قؤل دهم کي أ گبأن, هيدأنه شيمي خألقˇ گبأن ني-يه. أشأن, خألي ويرۊسي فيکرأني ايسيد کي شيمي ذهنأ مسمۊمأ کۊده دأريد. هيچ وخت ونأليد زيويشˇ دۊرۊن کسي شيمي بنأ اۊسأنأ تعيين بۊکۊنه. بينأ کۊنيد أسرنؤ شيمي ذهنأ ديچين وأچين کۊدن. رۊزأن اۊ گبأني کي خۊدأ شيمي وأسي بۊگؤفته سر فيکر بکۊنيد. شيمي مرأ بيگيد: من برکت بدأ بؤبؤسته-يم, من سأقم, من استعدأد دأرم, من أرزشمندم, خؤرم رۊزأن مي رأفأ ايسأ.
أگه شۊمأن مي أ گبأ گۊشأ کۊنيد ؤ عمل بۊکۊنيد, شمرأ قؤل دهم کي اۊ محدۊدˇ فيکر ؤ ذهنيتي کي ونأشتي شۊمأن پيشرفت بۊکۊنيد, شيمي ذهنˇ جأ پأکأبه ؤ شۊمأن هرتأ کأرأ دس بزنيد, خألي مؤفقيت به دس أوريدي. (جؤل اۊستين)
أ پؤست دۊمبأله دأره هروخت آمأده-أ بؤسته هأيأ مۊنتشرأ به
