جنگل دۊمباله دأره...
بۊکۊش تا ترأ نۊکۊشتده؛ جنگلˇ داب هنه...
اۊ زمات کي دئه راىˇ گۊرۊز نمانه آدم ناچاري دس به شمشير بره
أن هۊ جنگلˇ تعريفه، ولي سيويليزه بؤبؤ، جه وحشي داب برۊن بامؤ، ايزه ني دس ببردد أنˇ وأگردانˇ دۊرۊن.
جنگلˇ داب أنˇ کي هتؤ بيده نيده وأ کۊشتن، ولي وختي شاري بؤبؤستي ؤ سيويليزه،
وأ اول دليل بأري بزين هرتا کار تي ديل بخأسته تأني کۊدن، هرچن قانۊن لاب، تي پۊشتي-يأ نۊکۊنه،
ولي خأ، أنقد نر ؤ مادده دأره کي بتأني جيويشتن...
أنˇ چم ني أتؤيه کي مثن باستاني آثارˇ مسئۊلي؛
نیشیني فيکر کۊني کي چۊتؤ شأ ايتأ خۊجير کار کۊدن، جه اۊيأ کي تي کارˇ دۊرۊن اۊستائي فیلفؤر ايتأ را ترأ بياد أيه...
هرتا خانه کي سفالسره، همهˈ واچينيد حلب بۊکۊنيد... صفي مچدˇ مانستن.
هرتا قديمي ساختمان کي هني نهأ، فۊگۊردانيد، اۊنˇ جا ايتأ قشنگˇ ساختمان چاکۊنيد... ابتهاجˇ پئري خانه ؤ نؤبلˇ خانه مانستن.
هرتا قديمي بساخته کي نهأ، هنده فۊگۊردانيد اۊنˇ جا هرچي شيمي ديل بخأسته چاکۊنيد، مثن بازارˇ کاروانسرائانأ همهˈ فۊگۊردانيد أسرنؤ چاکۊنيد، أصن اۊشانˇ جا پاساژ چاکۊنيد، دأنم، شيمي ديل مردۊمˇ ويجا نهأ، خأئيد أتؤ بيکاري کۊنهˈ بتاشيد... (خۊدا شمرأ قؤوت بده پالوانان).
ولي... ولي ايتأ مۊشکيل نهأ، اۊنم أنˇ کي سيويليزه ؤ شاري آدم کي هنقد کارأ ئي-مرتبه نۊکۊنه، ماندي به...
(أمي مييان باشد، وختی أنگۊشدانهˈ گيدي مئدانˇ مشق ؤ آفتاب به آفتاب چئل قدم را کۊنيدي، هتؤ به دئه...
شاري بؤستنˇ عأيب هنه، آدمأ ايزه...)
ناقلن فۊگۊردانيد، پاساژم نؤبؤسته نؤبؤسته، پارکينگ کي به...
مؤضۊ جا دۊرأ بؤستيم؛ خأستيم جنگلˇ داب ؤ دۊستۊرأ ايمرۊ مرأ بيگيم...
هنقد واچئن ؤ دينچئن ؤ فۊگۊردانئن ؤ آبادأ نۊکۊدن ؤ دؤرسنئن، أنˇ وأستي-يه کي
أ سيويليزه ؤ شاري آدمان خأيد به گزأ شؤنأ پيش دکفد... هنده وأورسي چۊتؤ؟!
گيلکان گيدي «دۊ زن-دار مچد خۊسه» ولي «اۊيأ کي رانمائي رانندگي مأمۊر بئسه، چراغˇ گبأ نوأ گۊش کۊدن»...
أسأ أشان هيچ، نيديني هيتتا خانه سفالسر ني-يه؟!
تش سۊجي-يانأ نييده-ئي؟!
بازۊن أگه بکفه اينفرˇ سرأ بگنه، کيسه جواب بدنه؟!!
هنˇ وأستي، صفي مچدˇ چن هيزار ساله سرأ حلب بۊکۊدد...
هنˇ وأستي سعادتˇ کاروانسرايأ خرابأ کۊدان درد...
هنˇ وأستي ابتهاجˇ پئري خانهˈ فۊگۊردانئن درد...
هنˇ وأستي نؤبلˇ خانهˈ فۊگۊردانئد؛ أسرنؤ بساختد...
هنˇ وأستي أنقد کۊنمۊنه بۊکۊدد کي ميرزاکۊچي خانˇ پئري خانه فۊگۊردست،
ساختنˇ مؤقه واخبأ بؤستد (أمان بۊگؤفتيم واخبأ بؤستد، شۊمانم هنأ بيگيد).
أسأ چاره چيسه؛ وا سيويليزه ؤ شاري آدمانˇ مانستن (وحشي-يانˇ مانستن نأ) بیشي تي صفه دۊرۊن ايتأ هشتگ بزني
#نه-به-تخريب- ... (أسأ هرچي)
فلانکسˇ قؤلي هأ ايمرۊ قدرأ بدأريم کي ديرۊ، ايمرۊ جا بدتر بۊ...
راس گه؛ پۊردˇ عراقأ کي فۊگۊردانئد هي کس نۊبۊ ايتأ هشتگ اۊنه بزنه... خبرگۊزاري-يانم بخألي أشانˇ پۊلأ فاندأ بيد،
اعتصابˇ دۊرۊن ايسا بيد، نتانستد ثابت قدمˇ دؤره مانستن مردۊمˇ گبأ زهار يأ خۊشانˇ قؤلي {منعکس} بۊکۊند...
نأنم شائد پيرشرفشایأ ديل بدأده کي بۊگؤفته بۊ:
مي ديل به بلا دره، تي زۊلفأ واچينا
ندانمه مي ديل ؤ تي زۊلف چنينا؟
به کعبه بۊشؤم پنداشتم واچينا
مي کعبه تۊئي، بي تۊ کعبهˈ واچينا
أشانˇ کعبه-يم مردۊمد، هرچي کي بخأيه مردۊمأ به گزأده؛ «واچینا»
ولی جه همه-کس بئتر خۊدابيامرز افراشته بۊگؤده:
شارأ تۊ آبادأ کۊني شاري شيمي جيره-خۊره
*
*
أسأ را چيسه؛
شئونˇ خۊدابيامرزˇ قؤلي:
اۊشاني کي هسأ أشانˇ سعى دخيله
وأ ويريزيد.
ويريزيد، هسأ وختˇ کۊششه، جانˇ براران
وختˇ خۊنˇ جۊششه، جانˇ براران. (حسين کسمائي)
آها، جنگل دۊمباله دأره...
*
ببه کي فردأ، ايمرۊ جا بئتر ببه.
