أگه قبرˇ جأ به ئي جيگأ دري دينبه چي؟
يأ کي تۊمأنأبؤ پس, مأشري دينبه چي؟
گيرم کي در نهأ يؤ دسگيره-يم دأره-يأ
اۊ چٚوٚرˇ زيمينˇ مئن, هيکس دينبه چي؟
کفني مرأ فأکش فأکش گيلˇ جأ ويريزم ؤ مي حققأ بخأيم
اۊ دأدٚگأ دبيرˇ دس, دفتري دينبه چي؟
شيرأزˇ أصلˇ دوأيأ بدأمأ جه دس
أگه ايتأ گيرأتر خۊمي دينبه چي؟
أجۊر کي هممه-چي نأجه-أ مي ديل بنأمأ أيأ
أگه هيتتأ گۊنأ ره, کيفري دينبه چي؟
ببرده کيسه أ کلأچ ملأچ بأزي دۊرۊن
اۊ دئقه مييأن أگه دأوري دينبه چي؟
أيأ گۊش بۊکۊنيد
نأم سييأيي کي مردۊمˇ آفتˇ جأن ايسي |
تۊنم شي, تۊنم شي کسأنˇ دۊمبأله پسي |
أگه هيأتˇ جأ وأورسه پلأپچ ترأ |
بۊگۊ محرم أمي هأ صوب تأ ظؤره-يأ |
محرم هأ بيگيل دۊخۊفته-نأ, وطن |
محرم هأ هأچينه حقسأيأنأ, وطن |
أجۊر گؤرخؤله شبأن کي مردۊم أسيريدي |
اۊنˇ مئن صد تأ شأمˇ غريبأن أويريدي |
هأنقده آدمي کي هر رۊز بۊکۊشته بيدي |
وأکۊده کۊري کي بني هأشمˇ جغلأنيدي |
اؤهؤى کفتألٚى کي خرأنˇ مأنستن ايسي |
تۊنم شي, تۊنم شي کسأنˇ دۊمبأله پسي |
أ غۊرصه کي بشکنه هأى ميلتˇ پۊشتأ ددأر |
نيشينه تي اۊ چأنˇ پسأ, کؤلأنه, هأايوأر |
هأتؤ تۊندأگيفته وؤرأثٚى بي صٚبٚر |
بأييم ايتأ ايتأ تي اۊ قبرˇ سر |
وأورسيم کؤنأ تي دۊنکۊشسته وأبرأزئنأ؟ |
کؤنأ اۊ سکي کي ديميشته أ بختˇ مئنأ؟ |
کي گۊش بۊکۊن کي بأمؤج تۊ اؤهؤى کفتألٚى |
چي ببردي گيلˇ مئن, جه اۊ خأل ؤ ولگٚى؟ |
کۊنأ تي مينيندي گۊرگۊنۊسأن کؤنأ؟ |
هۊ تۊشکأني کي هأ چأکأ پۊرأ کۊنأ؟ |
هۊ گيل گيلأنˇ چلکˇ پئرهأنأن |
ندأني-يأ تأ مرگ جأنگي بۊخۊرده درأن |
کي تييأن ؤ کترأ ؤ فيللي مرأ |
ترأ بأل زنيدي خأش وأليسي مرأ |
کؤنأ اۊ پيله کيش ؤ مأت کۊنˇ چأترٚى؟ |
کؤنأ اۊ هلمأله تۊمأنأ نؤبؤستنٚى؟ |
تۊنم شي, أمي أ تۊشکˇ جيجأ |
هأ رأفأ دريم, أمأن همه-تأ |
هأتؤ تۊندأگيفته وؤرأثٚى بي صٚبٚر |
بأييم ايتأ ايتأ تي اۊ قبرˇ سر |
وأورسيم ترأ, زيويشٚى أمي شين کؤنأ؟ |
اؤهؤى کفتألٚى, جوأني أمي شين کؤنأ؟ |
نأله وسته, زهأر وأستي زئن
دوسته گۊشأ ددأر وأستي زئن
اؤرگأنيم صدأيأ ويريزيم
نأجه سخفأ جدأر وأستي زئن
أسأ کي مأر فۊچۊرده پئر تأم بزه
گيلکˇ نتأجأ به کأر وأستي زئن
أمأن گيلکيم, نيئيم اۊ کس کي
اۊنˇ غيرتأ به آب وأستي زئن
ايرأنˇ زيويستنه, غنيمأنأ
فردأ نأ, ايمرۊ به دأر وأستي زئن
ويريز, #زنأى-زيويش-آزأتي ره
أنˇ تأريخأ, مۊردأل وأستي زئن
